”Yo ana ae sing ngomong, lan A siji iki. Miturut kandhane wong sing kalebu ora baen-baen, tegese yo melu njegur ing jagade calonan, masiyo pawongan sing wis ngomong ora bakal melu nyalon, nyatane meneng-meneng yo isih muleg, nggolek hubungan ngalor ngidul,” jawabe Singo.
Bar omong ngono iku, wong loro, Lik Di karo Min Singo dho dheleg-dheleg. Meneng karo mripate nlawung, kaya-kaya agek mbayangno barang sing urung genah jluntrute. Mbuh, ogak nggenah apa kira-kira sing dibayangno wong loro iku.
Mbok menawa ae, iki mbok menawa lho, Lik Di mbayangno jebul isih urung isa “diarani” calonane Bupati. Isih dowu jilide, menawa iku crita silat. Umpama kok misale iku crita besambung, kaya to “roman sacuil”, serine ya isih dowu menawa arep ngerti cuthele crita.
Dene Min Singo mbayangnone luwih jelas timbang Lik Di. Singa mbayangno, mengko angger wis genah sapa sing direkomendasi PDI-P kanggo maju nyalon, bakal “kebukak” sakabehane.
Sakumpama, ing rekom mengko sing mesthi ugo nyantumno partai koalisi, bakal iso dientho-entho, turahane partai sing ora melu koalisi karo PDI. Sepisan meneh iki mung tembung umpama, mengko koalisine PDI-P bener-bener karo PKB, Golkar, PKS, Hanura, Perindo, Gerindra, berarti isih ana sisa telung partai, yaiku PPP, Demokrat lan Nasdem.
Ora usah ngrembuk sapa sing bakal maju saka koalisi partai telu iku mau (Nasdem, PPP, Demokrat), dientho-entho meneh, koalisi sing memungkinkan isa ngusung pasangan calon, Nasdem karo PPP – Nasdem karo Demokrat, utawa telune koalisi. Nek, Demokrat karo PPP ora isa ngusung, soale gunggune kursine mung wolung kursi.
”Mboh-mboh Min, ngelu sirahku. Nek kanggoku, masiyo syarat kanggo dadi politisi iku kudu pawongan sing ogak entuk lali karo babagan apa ae sing wis nate diapusno, mesthine mungga dadi politisi iku ya sing apik lan pener. Maksude, nalika ngapusi ya piye carane isa luwes. Tujuane ngapusi iku mau kanggo nata kesejahteraan masyarakat sing luwih apik,” tanggape Lik Di karo nglungani.
Mumpung isih krungu kupinge Lik Di, Min Singa nyenggaki karo parikan, “Beras iku asale soko Pari, kandas kui asale soko Ngapusi”. *)
