Malah-malah, saking wis kadung “ngerak”, ngapusi ing ubengane ndonya politik, nalika ana sing ngomong jujur, nganggo sumpah barang, tetep ae didarani ngapusi.
”Omonganem leh Min, kaya penyiar TiPi ae. Ojo-ojo ceramahmu sing ngono iku merga kowe nduwe calon. Terus omonganem abot siseh, utawa wis ogak netral meneh,” Lik Di nyenggaki, semune ngenyek.
Ogak trima dinyek, Min Singo kandha wani sumpah nek dheweke nduwe calon. Kanggo ngyakinake Lik Di, Singo nganti ngajak sumpah “Njanjang”. ”Karek kowe Di. Aku mbok jak sumpah ning “Njanjang” yo wani kok. Dienteni sambi melek karo merem ae, kaya ngapa mengko calonan Bupati.”
Maksudku, Min Singo mbacutno omongan, kaya ngapa mengko calonan iku mau. Dititeni calone pira, lan sapa ae ? Terus kira-kira wong matoh-matoh sing kandha ora arep melu nyalon ngono iku, bakale melu nyalon pora ?
Ngonceki Rembug
mBlakrak-mblakrak Min Singo ngonceki siji mboko siji rembuge tokoh-tokoh matoh sing jarene ora arep melu nyalon. Dikandhakno, nek kanggone wong-sing gak patio mudheng yo dipangan mentah. Anggepane, wong-wong iku mau wis mesthi ora bakal melok ngramekno calonan.
Ana sing ngomong ora arep nyalon Bupati. Misale, mengko tekane nggawe terus melu nyalon Wakil Bupati, khan entuk lan yo sah-sah ae. Malah kepara yo tetep nyalon Bupati. Ngono iku yo ogak ana sing nglarang.
”Omonganem sing kaya ngono iku jarene sapa, kok mandhes leh Min ?” Pitakone Lik Di sing kamitemenggengen ngrungokno rembuge Singo.
