” GAK ana tindak culika sing ora ninggalake bekas utawa bukti. Merga keprigelane polisi Polsek Todanan, Polres Blora, Sumijan sing dinuga ngapusi Warkam (63) iku mau kasil diringkus. Nganti ing wektu iki, Sumijan isih ditahan ing Mapolsek Todanan. “
BLORA, topdetiknews.com – Nganyelke karo apa kang ditindakake Sumijan (47), warga Kabupaten Grobogan iki. Ngaku aparat intel Koramil apus-apus wong nDesa Dringo, Kecamatan Todanan, Blora.
Moduse, pawongan kang ngaku Intel iku mau pura-pura nawake wedus cacah lima kanti rega Rp 5 juta karo korban, yaiku Warkam (63) petani saka Desa Dringo.
Gak ana tindak culika sing ora ninggalake bekas utawa bukti. Merga keprigelane polisi Polsek Todanan, Polres Blora, Sumijan sing dinuga ngapusi Warkam (63) iku mau kasil diringkus. Nganti ing wektu iki, Sumijan isih ditahan ing Mapolsek Todanan.
Kapolsek Todanan, AKP Daknyo mbenerake anane laporan apus-apus sing ditindakake Sumijan. “Bener, ana warga sing nglaporake tindak pidana penipuan sing ditindake sakwenehe pawongan kang ngaku-ngaku Intel Koramil,” terange Daknyo, Jumat (14/1/2022).
Tumindak apus-apus iku, mula bukane, ing dina Rabu (5/1/2022) udakara jam 07.30 WIB, korban Warkam nembe lungguhan ning ngarep omah. Wektu iku ana pawongan moro ngaku Intel Koramil, lan nawakae wedus cacah lima kanthi rega Rp 5 juta.
Pawongan kang keri-keri aran Sumijan soko Grobogan iku alesan, menawa lagi butuh duit kanggo tambahan tuku mobil. Mbuh kena gendam apa, korban mung manut nalika diajak ning Kantor Koramil saperlu njupuk wedus.
Mung bae, sakdurunge ning ngarep Kantor Koramil, “Intel” kasebut mbujuk korban supaya mandeg ning ngarepe Pasar Todanan, lan njaluk korban menehake duit Rp 5 juta.
Meneh-meneh korban mung manut nalika dikongkon nunggu ning pinggir ndalan, lan dialesi sang “Intel” arep njupuk mobil pikcup kanggo ngangkut wedus cacah lima ning omahe.
Sakwise ditunggu udakara 30 menit, pawongan kang ngaku intel iku mau ora mecungul, korban Warkam nyoba tekon karo petugas kebersihan. Jawaban kang dientukake, jebul ora ana wedus sing dideleh ning Koramil Todanan. Krasa nek kapusan, korban sakbanjure lapor ning ke Polsek Todanan.
Entuk laporan kasebut, Kapolsek Todanan, AKP Daknyo mrintahake Kanit Reskrim Iptu Suyadi supaya nyelidiki. Ing dina Kamis (13/1) udakara jam 07.00 esuk, Kapolsek Todanan entuk informasi menawa pelaku nembe ning Pasar Kradenan Grobogan.
Ora gancangan wektu, Kapolsek Daknyo mrentahke Kanit Reskrim Iptu Suyadi nindaklanjuti informasi kasebut, lan bener pelaku nembe ana ing Pasar Kradenan. Sakbanjure pelaku langsung diringkus lan diglandang ning Polsek Todana kanggo diprikso.
Sakliyane ngringkus pelaku, polisi uga nyita sakwenehe barang bukti. Koyoto, Motor Suzuki Sky Drive, jaket werna abang maron, clana jeans werna biru, lan sepasang sepatu werna ireng. Barang-barang iku mau dinuga dienggo pelaku nalka nindakake apus-apus. *)
Penulis : Muji
Editor : Daryanto
