Mak pyoh pikire Jo Gowang krungu critane Lik Di sing jarene ngimpi dijak wong nganggo sandangan sarwo putih mlaku-mlaku ning Pati iku maeng parek esuk. Kelingan pesene wong-wong sengen, ati-ati nek ngimpi pareg isuk. Kabeh kedadeyan sing ana alame ngimpi bakal kedadeyan ning alame kasunyatan.
Gentenan Jo Gowang sing ngowah ngowoh kyo umplung merga mbayangno sing ora-ora. Wong nek nggugoni omongane mbah buyute sengen, sok sapa wae nek ngimpi parek isuk, ngono iku klebu pirangane ngimpi puspo tajem.
Wektu ngimpine udakara jam 03.00 nganti jam 06.00 isuk. Diyakini menawa ngimpi ning jam-jam semono iku biasane ana campur tangane sing Nyipto Jagad, mula firasate bakal kedadeyan.
Dewe nek ngimpi antarane jam sanga bengi nganti jam rolas, sing jarene kelebu perangan Titi Oni. Ngimpi sing ora nduwe arti apa-apa, kejaba mung dipengaruhi apa sing dialami pawongan sakurunge turu. Utawa kegawa pengaruh apa sing dilakoni nalika awane.
Termasuk nek menawa ngimpine udakara jam rolas nganti jam telu isuk, iku maeng mlebu perangane Gondo Oni. Mung nggambarake kualitas kejiwaane wong olehe nglakoni urip ning ndonya.
